'ಮಾಸ್ಟರ್ ಮೈಂಡ್'!!

ಮಗಳು ಹುಟ್ಟಿದ ಮೇಲೆ ಮತ್ತೊಮ್ಮೆ ಬಾಲ್ಯವನ್ನು ಅನುಭವಿಸುತ್ತಿರುವ  ನನಗೆ ಮತ್ತು ನನ್ನ ಮನೆಯವರಿಗೆ, ಈಗಿನ ಕಾಲಕ್ಕೆ ಸಿಗುತ್ತಿರುವ ಮಕ್ಕಳ ಬಗೆ ಬಗೆಯ ಬೋರ್ಡ್ ಗೇಮ್ ಗಳು ಒಂದು ಸೋಜಿಗ. ಮಗಳಿಗೆ ಚಿಕ್ಕಂದಿನಿಂದ್ಲೂ ಜೋಡಣೆಯ ಮಾದರಿಯ ಆಟಗಳು ಹೆಚ್ಚಾಗಿ ಆಸಕ್ತಿಯಿರುವುದರಿಂದ, ಅವಳ ಕಪಾಟಿನ ತುಂಬಾ ಬೋರ್ಡ್ ಗೇಮ್ ಗಳ ಬಾಕ್ಸ್ ಗಳೇ ತುಂಬಿಕೊಂಡಿವೆ. ನಾವು (ವಯಸ್ಸಿನಲ್ಲಿ) ಮಕ್ಕಳಾಗಿದ್ದ ಕಾಲಕ್ಕೆ ಜೂಟಾಟ, ಕಣ್ಣಾಮುಚ್ಚಾಲೆ, ಮರಕೋತಿ ಆಟ, ಕುಂಟಾಬಿಲ್ಲೆ, ಅಡುಗೆ ಆಟ, ಮಣ್ಣಿನಲ್ಲಿ ದೇವಸ್ಥಾನ ಕಟ್ಟುವುದು, ಶಟಲ್ ಬ್ಯಾಡ್ಮಿಂಟನ್, ಸೈಕಲ್ಲು, ಖೋ ಖೋ, ಬಾಲು-ಬ್ಯಾಟು, ಕ್ರಿಕೆಟ್ ಹೀಗೆ ಎಲ್ಲ ಓಡಾಡಿ ಆಡುವ ಹೊರಾಂಗಣ ಆಟಗಳೇ ಹೆಚ್ಚಾಗಿ ರೂಡಿಯಲ್ಲಿದ್ದವು. ಆಟಿಕೆಗಳ ಕೊರತೆಯಿಲ್ಲದಿದ್ದರೂ ಸಾಗರದಂತ ಊರಲ್ಲಿ ವಿಶೇಷ ಆಟಿಕೆಗಳೇನೂ ಸಿಗ್ತಿರ್ಲಿಲ್ಲ. ಸಾಮಾನ್ಯವಾಗಿ ಸಿಗುತ್ತಿದ್ದ ಒಂದಷ್ಟು ಗೊಂಬೆಗಳು, ಕವಡೆ, ಚನ್ನೆಮಣೆ, ಹಾವು-ಏಣಿ, ಚದುರಂಗ, ಕೇರಂ ಬೋರ್ಡ್ ಇವೇ ಎಲ್ಲಾ ಎಲ್ಲರ ಮನೆಯಲ್ಲೂ ಲಭ್ಯವಿರುತ್ತಿದ್ದಆಟದ ಸಾಮಾನುಗಳು.  ಬೆಂಗಳೂರಿನಿಂದ ಸೋದರಮಾವ ರಜೆಯಲ್ಲಿ ಮಕ್ಕಳು ಆಡ್ಕೊಳ್ಳಿ ಎಂದು 'ಬಿಸಿನೆಸ್ ಬೋರ್ಡ್' ಆಟದ ಬಾಕ್ಸ್ ಅನ್ನು ಅಜ್ಜನ ಮನೆಗೆ ತಂದಾಗ, ಅದೇ ಒಂದು ದೊಡ್ಡ ವಿಶೇಷವಾದ ಆಟ ನಮಗಾಗ.. ಈಗೆಂತು ಬಿಡಿ, ಮಾರುಕಟ್ಟೆಯಲ್ಲಿ ನೂರಾರು ಬಗೆಯ ಬೋರ್ಡ್ ಗೇಮ್ ಗಳು ಲಭ್ಯ. ಹೆಚ್ಚು ಮೊಬೈಲ್, ಟಿವಿ, ಲ್ಯಾಪ್ಟಾಪ್ ಗೀಳಿಗೆ ಮಗಳನ್ನು ಹಚ್ಚದ ಕಾರಣ, ಅವಳಿಗೆ ಭೌತಿಕವಾಗಿ ಆಡುವಂತಹ ಆಟಗಳನ್ನೇ ನೀಡುವ ಪ್ರಯತ್ನದಲ್ಲಿ, ಈಗ ಅವಳ ಜೊತೆ ನಾವೂ ಕೂಡ ಕೂತು ಆಡುವ ರಮ್ಯ ಚೈತ್ರ ಕಾಲ. ಇಂತಿಪ್ಪ ಅವಳ ಆಟಿಕೆಗಳಲ್ಲಿ, ಕಳೆದ ವರ್ಷ ಅವಳ ಬರ್ತಡೆಗೆ ಸ್ನೇಹಿತರೊಬ್ಬರು ನೀಡಿದ್ದ ಉಡುಗೊರೆಯಾಗಿ ಬಂದಿದ್ದ, ಸಧ್ಯಕ್ಕೆ ಗೀಳು ಹಿಡಿದಿರುವ ಒಂದು ಆಸಕ್ತಿದಾಯಕ ಆಟ 'ಮಾಸ್ಟರ್ ಮೈಂಡ್' ಗೇಮ್.

'ಮಾಸ್ಟರ್ ಮೈಂಡ್' ಗೇಮನ್ನು ಮೊದಲ ಸಾರಿ ಕಂಡಾಗ,ಕ್ಯೂರಿಯೋಸಿಟಿ ಗೆ ಇದರ ಕುರಿತಾಗಿ ಗೂಗಲ್ ಮಾಡಿದಾಗ ಇದರ ಇತಿಹಾಸ, ದೊರಕಿದ ಮಾಹಿತಿಗಳು ಕೂಡ ಅಷ್ಟೇ ರೋಚಕವಾಗಿದ್ದವು. ಇಸ್ರೇಲಿನ ಟೆಲಿಕಂಮ್ಯುನಿಕೇಷನ್ ಪೋಸ್ಟ್ ಮಾಸ್ಟರ್ ಒಬ್ಬರಿಂದ ಆವಿಷ್ಕಾರಗೊಂಡ ಆಟವಾದರೂ, ಶತಮಾನಗಳ ಹಿಂದೆ ಸಾಂಪ್ರದಾಯಿಕವಾಗಿ ಪೆನ್ಸಿಲು ಮತ್ತು ಪೇಪರ್ರಿನಲ್ಲಿ ಆಡುತ್ತಿದ್ದ ೪ ಅಂಕಿಗಳ 'Cows and bulls' ಆಟದ ಅನುರೂಪವೇ ಈ ಮಾಸ್ಟರ್ ಮೈಂಡ್ ಗೇಮ್. ೪ ಅಂಕಿಗಳ ಸಂಖ್ಯೆಯೊಂದನ್ನು ಸೀಕ್ರೆಟ್ ನಂಬರ್ರಾಗಿಟ್ಟುಕೊಂಡು, ಅದನ್ನು ಮತ್ತೊಬ್ಬ ಆಟಗಾರ ಸರಿಯಾದ ಅಂಕೆಗಳು ಮತ್ತದರ ಸ್ಥಾನಗಳನ್ನು ಊಹಿಸಿ ಕಂಡುಹಿಡಿಯಬೇಕು. ಸರಿಯಾದ ಸ್ಥಾನ ಮತ್ತು ಅಂಕೆಯನ್ನು bull  ಪ್ರಮಾಣದಿಂದ ಸೂಚಿಸಿದರೆ, ಸರಿಯಾದ ಅಂಕೆ ಇದ್ದರೆ 'cow' ಎಂಬ ಸುಳಿವು ನೀಡಲಾಗುತ್ತಿತ್ತು. ಈ ಆಟಕ್ಕೆ ಗಣಿತ ಕ್ರಮಾವಳಿ ಅಥವಾ ತಂತ್ರಗಳ ಬಳಕೆ ಕೂಡ ಒಂದು ಕೌಶಲ್ಯವಾಗಿ ಉಪಯೋಗವಾಗುತ್ತದೆ. ಈ ಪೇಪರ್ರಿನ ಆಟದ ಕ್ರಮಾವಳಿಯನ್ನೇ ವಸ್ತುವಿಷಯವಾಗಿಟ್ಟುಕೊಂಡು, ೧೯೬೮ ರಲ್ಲಿ, ಕೇಂಬ್ರಿಡ್ಜ್ ಯುನಿವರ್ಸಿಟಿಯ ಬೃಹತ್ಗಣಕಕ್ಕೆ ಮೊದಲ ಸಾರಿ ಗಣಕಯಂತ್ರ ಪ್ರೋಗ್ರಾಮ್ ಅನ್ನು ಬರೆಯಲಾಗಿತ್ತಂತೆ.  ವರ್ಷಗಳು ಕಳೆದಂತೆ ವರ್ಡ್ ಮಾಸ್ಟರ್ ಮೈಂಡ್, ನಂಬರ್ಸ್ ಮಾಸ್ಟರ್ ಮೈಂಡ್, ಎಲೆಕ್ಟ್ರಾನಿಕ್ ಮಾಸ್ಟರ್ ಮೈಂಡ್ ಇತ್ಯಾದಿಯಾಗಿ ಹಲವಾರು ಕಾಂಬಿನೇಶನನ್ನಿನ್ನ ಹಲವು ಬಗೆಯ ಮಾಸ್ಟರ್ ಮೈಂಡ್ ಗೇಮ್ಗಗಳು ಳನ್ನು ಗಣಕ ತಂತ್ರಜ್ಞಾನದಲ್ಲಿ ಅಭಿವೃದ್ಧಿಪಡಿಸಲಾಯಿತು. ಈಗೆಂತು  ಸಾಕಷ್ಟು iOS  ಮತ್ತು ಆಂಡ್ರಾಯ್ಡ್ ಆವೃತ್ತಿಯ ಹಲವಾರು ಗೇಮ್ಸ್ ಅಪ್ ಗಳು ಉಚಿತವಾಗಿ ಲಭ್ಯವಿದೆ .   

  

ಮಾಸ್ಟರ್ ಮೈಂಡ್ ಗೇಮ್ ಒಂದು ಸಲಕ್ಕೆ ಇಬ್ಬರು ಆಡಬಹುದಾದಂತಹ ಆಟ. ಮಕ್ಕಳ ಆಕರ್ಷಣೆಗೆಂದು ವಿವಿಧ ಥೀಮ್ ನಲ್ಲಿ ದೊರಕುವ ಈ ಬೋರ್ಡ್ ಗೇಮ್,  ನಮ್ಮ ಮನೆಗೆ  ಆಗಮಿಸಿರುವುದು ಜಂಗಲ್ ಥೀಮಿನಲ್ಲಿ. ಹಸಿರು ಬಣ್ಣದ ಬೋರ್ಡಿನ ತುಂಬಾ ೩ ಸಾಲಿನ ಹಲವಾರು ರಂದ್ರಗಳಿರುತ್ತವೆ. ಈ ಆಟದಲ್ಲಿ ಒಬ್ಬ 'ಕೋಡ್ ಮೇಕರ್ ' ಆದರೆ ಮತ್ತೊಬ್ಬ 'ಕೋಡ್ ಬ್ರೇಕರ್' ಆಗುತ್ತಾನೆ. ಆಟ  ಹೀಗೆ ಸಾಗುತ್ತದೆ. 'ಕೋಡ್ ಮೇಕರ್' ೬ ವರ್ಣಗಳಲ್ಲಿ ದೊರಕಿರುವ ವಿವಿಧ ಪ್ರಾಣಿಗಳಲ್ಲಿ ಯಾವುದಾದರೂ ೩ ಚಿಹ್ನೆಗಳನ್ನು ಬೋರ್ಡಿನ ಒಂದು ತುದಿಯಲ್ಲಿ ನೀಡಿರುವ ಸೀಕ್ರೆಟ್ ಜಾಗದಲ್ಲಿ ಎದುರಾಳಿಗೆ ಕಾಣದಂತೆ ಜೋಡಿಸಿ ಇಡಬೇಕು. 'ಕೋಡ್ ಬ್ರೇಕರ್' ನ ಕೆಲಸವೆಂದರೆ, ತನ್ನ ಬುದ್ಧಿ ಚಾಣಾಕ್ಷಕತೆಯಿಂದ, ತನ್ನ ಬಳಿಯಿರುವ ೬ ವರ್ಣಗಳ ಪ್ರಾಣಿಗಳಲ್ಲಿ, ೩ ವರ್ಣಗಳನ್ನು ಸಾಲಾಗಿ ಊಹಿಸಿ ಜೋಡಿಸುತ್ತಾ ಹೋಗಬೇಕು. ಸರಿಯಾದ ೩ ವರ್ಣಗಳು ಮತ್ತು ಅವುಗಳ ಸ್ಥಾನ ಎಲ್ಲವೂ ಹೊಂದಿಕೆಯಾಗುವವರೆಗೆ ನಿರಂತರವಾಗಿ ೩ ಪೇದೆಗಳನ್ನು ಸಾಲಾಗಿ ಊಹಿಸುತ್ತ ಸಾಗಬೇಕು. ಪ್ರತಿಸಲವೂ ವರ್ಣಗಳ ಜೋಡಣೆ ಮಾಡಿದಂತೆಯೂ, ಕೋಡ್ ಮೇಕರ್ ಸರಿಯೇ ತಪ್ಪೇ ಎಂಬ ಮರುಮಾಹಿತಿ ತಿಳಿಸಲು, ಆ ಊಹಿಕೆಯ ನೇರ ಸಾಲಿನಲ್ಲಿ ಬಿಳಿ ಮತ್ತು ಕೆಂಪು ಬಣ್ಣದ ಗುರುತನ್ನುಇಡುತ್ತಾನೆ. ಬಿಳಿ ಬಣ್ಣವು 'ಸರಿಯಾದ ವರ್ಣ ಆದರೆ ತಪ್ಪು ಸ್ಥಾನದಲ್ಲಿ' ಎಂಬುದನ್ನು ಸೂಚಿಸಿದರೆ, ಕೆಂಪು ಬಣ್ಣ ಇಟ್ಟಿರುವ ವರ್ಣ 'ಸರಿಯಾದದ್ದು ಮತ್ತು ಸರಿಯಾದ ಸ್ಥಳದಲ್ಲಿದೆ' ಎಂಬುದನ್ನು ತಿಳಿಸಲುಬಳಸಲಾಗುತ್ತದೆ. ಹೀಗೆ ದೊರಕಿದ ಮಾಹಿತಿಯನ್ನನುಕರಿಸಿ ಕ್ರಮ ಪಲ್ಲಟನೆ ಮಾಡುತ್ತಾ 'ಕೋಡ್ ಮೇಕರ್' ರೂಪಿಸರುವ ಕೋಡ್  ಅನ್ನು ಕಂಡು ಹಿಡಿಯಬೇಕಾಗುತ್ತದೆ. ಇದನ್ನು ನಿರ್ಮಿಸಲು ಪ್ರಯತ್ನಿಸುವುದು ನೋಡುವಷ್ಟು ಸುಲಭವಲ್ಲ. ಏಕೆಂದರೆ ಇದರಲ್ಲಿ ಚಾಲೆಂಜ್ ಎಂದರೆ ಅತ್ಯಂತ ಕಡಿಮೆ ಸಾಲುಗಳ ಸಾಧ್ಯತೆಯಲ್ಲಿ ಈ ಕೋಡ್ ಬ್ರೇಕ್ ಆಗಬೇಕು. ಮಾತಿಗೆ ಅವಕಾಶವಿಲ್ಲದೇ ಕೇವಲ ಬಣ್ಣದ ಚಿಹ್ನೆಗಳ ಮೂಲಕ ಕೋಡನ್ನು ಕಂಡು ಹಿಡಿಯುವುದು ನಮ್ಮ ಬುದ್ಧಿಗೊಂದಷ್ಟು ಹೊಂವರ್ಕ್ ಕೊಟ್ಟಂತೆ. 

 ೬ ವರ್ಣಗಳಲ್ಲಿ ೩ ವರ್ಣಗಳ ಸಾಧ್ಯತೆಯ ಊಹಿಕೆ,  ಸ್ಥಾನ ಪಲ್ಲಟನೆಯ ಚಾಣಾಕ್ಷತೆ ಎಲ್ಲವೂ ಮೆದುಳಿಗೆ ಚುರುಕು ಮುಟ್ಟಿಸಿ ನಮ್ಮನ್ನು ಜಾಗೃತಗೊಳಿಸುವುದರಲ್ಲಿ ಏನೂ ಸಂದೇಹವಿಲ್ಲ. ಚದುರಂಗದಂತೆಯೇ  ಹಂತ ಹಂತವಾಗಿ ಮುಂದಿನ ಸಂಭವನೆಯನ್ನು ಊಹಿಸುವಂತೆಯೇ ಈ ಆಟವೂ ನಮ್ಮ ಯೋಚನಾ ಶಕ್ತಿಯನ್ನು ಉತ್ತಮಗೊಳಿಸುತ್ತದೆ. ಚಿಕ್ಕ ಮಕ್ಕಳಿಗೆಂದು ೩ ಸಾಲಿನ ಸಂಯೋಜನೆಯಲ್ಲಿ ದೊರಕುವ ಈ ಆಟಿಕೆ ವಯಸ್ಸಿಗನುಗುಣವಾಗಿ  ೪, ೫ ಸಾಲಿನ ಕಾಂಬಿನೇಷನ್ ನಲ್ಲೂ ಲಭ್ಯವಿದೆ. ಒಟ್ಟಾರೆಯಾಗಿ ದೊಡ್ಡವರು ಚಿಕ್ಕವರೆನ್ನದೇ ಆಡಲು ಒಂದು ಸೂಕ್ತ ಆಟ.