ಹಿಮಾಲಯದ ಕಾಂತೀಯ ನೋಟಗಳೊಂದಿಗೆ, ಗಮನಾರ್ಹವಾದ ಗಮ್ಯಸ್ಥಾನಗಳ ಹೇರಳತೆಯೊಂದಿಗೆ ಸರ್ವ ಕಾಲಕ್ಕೂ, ಭೇಟಿ ನೀಡಬಹುದಾದ ಪ್ರವಾಸ ಸ್ಥಳಗಳಲ್ಲಿ, ಭಾರತದ ಈಶಾನ್ಯ ಭಾಗದಲ್ಲಿರುವ ಸಿಕ್ಕಿಂ ಕೂಡ ಒಂದು. ಸೆವೆನ್ ಸಿಸ್ಟರ್ಸ್ ರಾಜ್ಯಗಳ ಪೈಕಿ ಕಿರಿದು. ದಾರ್ಜೀಲಿಂಗ್ ನಲ್ಲಿರುವಂತೆಯೇ, ಸಿಕ್ಕಿಂನಲ್ಲೂ ಕೂಡ ಟಿಬೆಟಿಯನ್ ಮೊನಸ್ಟರಿಗಳು, ಬೌದ್ಧ ಧರ್ಮದ ಅನುಯಾಯಿಗಳು ಸಾಕಷ್ಟು ಜನರಿದ್ದಾರೆ. ಹಿಮಾಲಯದ ಪರ್ವತಗಳು, ಬೆಳ್ಳನೆಯ ಮೋಡಗಳು, ಇಬ್ಬನಿ ಹರಡಿ ಕ್ಷಣಕ್ಷಣಕ್ಕೆ ಮಬ್ಬಾಗುವ ಹಾದಿಗಳು, ಹಚ್ಚಹಸಿರು ಮತ್ತವುಗಳ ಮಧ್ಯೆ ಅಲ್ಲಲ್ಲಿ ಕಾಣಿಸುವ ಬೌದ್ಧ ಧರ್ಮದ ಬಣ್ಣ ಬಣ್ಣದ ಧ್ವಜಗಳು!ಈ ವಿವಿಧ ಬಗೆಯ ಧ್ವಜಗಳು ನೋಡುಗರಿಗೆ ಅವರವರ ಭಾವಕ್ಕೆ ತಕ್ಕಂತೆ ಸಾಂತ್ವನ, ಸಂತಸದ ಅನುಭವವನ್ನು ನೀಡುತ್ತದೆ. ನಮ್ಮ ಪ್ರವಾಸದ ಹಾದಿಯುದ್ದಕ್ಕೂ ಕಾಣಸಿಗುತ್ತಿದ್ದ ಈ ಬಣ್ಣಬಣ್ಣದ ಧ್ವಜಗಳ ಕುರಿತಾಗಿ ಸಂಗ್ರಹಿಸಿದ ಒಂದಷ್ಟು ವಿಷಯಗಳು..
ಚಿತ್ರಗಳೊಂದಿಗೆ..
ಟಿಬೆಟಿಯನ್ ಜನರು ಪ್ರಕೃತಿಯನ್ನು ಗೌರವಿಸಲು ಈ ಪ್ರಾರ್ಥನಾ ಧ್ವಜಗಳನ್ನು ನೆಡುತ್ತಾರೆ. ಧ್ವಜದಲ್ಲಿನ ಐದು ಬಣ್ಣಗಳಲ್ಲಿ ಬಿಳಿ ಬಣ್ಣ ಗಾಳಿಯನ್ನೂ, ಕೆಂಪು ಬಣ್ಣ ಬೆಂಕಿಯನ್ನೂ, ಹಸಿರು ಬಣ್ಣ ನೀರನ್ನೂ, ಹಳದಿ ಭೂಮಿಯನ್ನೂ ಮತ್ತು ನೀಲಿ ಆಕಾಶವನ್ನು ಸಂಕೇತಿಸುತ್ತದೆ. ಈ ಧ್ವಜಗಳಲ್ಲಿ ಬೌದ್ಧರ ಮೂಲ ಪ್ರಾರ್ಥನಾ ಮಂತ್ರವಾದ ' ಓಂ ಮಣಿ ಪದ್ಮೇಹಂ" ಎಂದು ಬರೆದಿರುತ್ತದೆ. ಅಹಂಕಾರ, ಅಸೂಯೆ, ಅಜ್ಞಾನ, ದುರಾಸೆ ಮತ್ತು ಕೋಪವನ್ನು ನಿಗ್ರಹಿಸಲು ಈ ಮಂತ್ರ ಸಹಾಯ ಮಾಡುತ್ತದೆ ಎಂಬ ನಂಬಿಕೆಯಿದೆ. ಈ ಬಣ್ಣಬಣ್ಣದ ಧ್ವಜಗಳಲ್ಲಿ ಬರೆದಿರುವ ಮಂತ್ರಗಳು ೨೫೦೦ ವರ್ಷಗಳ ಹಿಂದೆ ಭಾರತದಲ್ಲಿ ಶಾಕ್ಯಮುನಿ ಬುದ್ಧನ ಪ್ರವಚನಗಳ ಪಠ್ಯಗಳು, ಧಾರಣೀ ಮಂತ್ರ ಇನ್ನೂ ಅನೇಕ ಬಗೆಯ ಸಂಸ್ಕೃತಮಂತ್ರಗಳಿಂದ ಕೂಡಿವೆ ಎಂದು ಹೇಳಲಾಗುತ್ತದೆ. ಈ ಧ್ವಜಗಳು ಎಂದೂ ಸ್ಥಿತವಾಗಿ ನಿಲ್ಲಬಾರದಂತೆ, ಧ್ವಜಗಳನ್ನು ನೆಲಕ್ಕೆ ಇಡಬಾರದಂತೆ, ಇವುಗಳು ಹಾರಾಡುತ್ತಲೇ ಇರಬೇಕಂತೆ. ಹಾಗಾಗಿಯೇ ಇದನ್ನು ಸಾಮಾನ್ಯ ಮನೆಯ ತೋರಣವಾಗಿ ಕಟ್ಟುತ್ತಾರೆ ಇಲ್ಲವೇ ಮೇಲ್ಚಾವಣಿ ಇನ್ನಿತರ ಎತ್ತರದ ಸ್ಥಳಗಳಲ್ಲಿ ಕಟ್ಟುತ್ತಾರೆ. ದೇವರಿಗೋಸ್ಕರ ಕಟ್ಟುವ ಧ್ವಜಗಳಲ್ಲ ಇವು. ಬದಲಾಗಿ ಈ ಧ್ವಜಗಳಲ್ಲಿನ ಮಂತ್ರಗಳು ಗಾಳಿಯನ್ನುಶುದ್ಧೀಕರಿಸುತ್ತವೆ, ವಾತಾವರಣವನ್ನು ಪವಿತ್ರಗೊಳಿಸುತ್ತವೆ, ದೈವದ ಧನಾತ್ಮಕ ಶಕ್ತಿಯನ್ನು ಎಲ್ಲೆಡೆ ಪಸರಿಸುತ್ತದೆ, ಶಾಂತಿಯನ್ನು ತರುತ್ತವೆ. ಬಣ್ಣಗಳು ಸಂತೋಷವನ್ನು ಕೊಡುತ್ತವೆ ಎಂಬ ಪ್ರತೀತಿಯಿದೆ.
ಈ ರೀತಿಯ ಧ್ವಜಗಳಲ್ಲಿ ಎರಡು ಬಗೆಗಳಿವೆ. ಸಮತಲವಾಗಿರುವ ಧ್ವಜಗಳಿಗೆ ಲುಂಗ್ದಾ ಎಂದೂ, ಲಂಬವಾಗಿರುವ ಧ್ವಜಗಳಿಗೆ ದಾರ್ಚೊ ಎಂದೂ ಕರೆಯುತ್ತಾರೆ. ಲಂಬವಾದ ಧ್ವಜಗಳು ಸಾಮಾನ್ಯವಾಗಿ ನಮಗೆ ಹಿಮಾಲಯದ ಎತ್ತರೆತ್ತರ ಬೆಟ್ಟಗಳ ಮೇಲೆ ಅತ್ಯಂತ ಎತ್ತರದ ಸ್ಥಳಗಳಲ್ಲಿ ಕಂಡು ಬಂದವು. ಯುದ್ಧ ಭಾವನೆಯಿಂದ ಶಾಂತಿ ಭಾವನೆಗೆ ಪರಿವರ್ತಿತಗೊಳ್ಳುವ ಸಂದೇಶವನ್ನು ಈ ಧ್ವಜಗಳು ಸಾರುತ್ತವೆ. ಕೇವಲ ಬಣ್ಣ ಬಣ್ಣದ ಬಟ್ಟೆಗಳ ಚೂರಿನಂತೆ ಕಾಣುವ ೪೦೦ ಕ್ಕೂ ಹೆಚ್ಚು ಬಗೆಯ ಮಂತ್ರಗಳು ಓದಲು ಸಿಗುತ್ತವೆಯಂತೆ. ಧ್ವಜಗಳ ಬಣ್ಣ ಮಾಸಿದಷ್ಟೂ ಕೂಡ ಶ್ರೇಷ್ಠ!ಧ್ವಜಗಳ ಕಟ್ಟುವುದು ಮತ್ತು ತೆಗೆಯುವುದಕ್ಕೂ ಕೂಡ ಅವರ ಪಂಚಾಂಗದಲ್ಲಿನ ಶುಭದಿನಗಳ ಎಣಿಕೆಯ ಪದ್ಧತಿ ಇದೆ. ಹಳೆಯ ಧ್ವಜಗಳನ್ನು ತೆಗೆಯುವ ಸಂದರ್ಭ ಬಂದರೆ, ಅವುಗಳನ್ನು ಅಷ್ಟೇ ಗೌರವದಿಂದ ಬೆಂಕಿಗೆ ಆಹುತಿ ನೀಡುತ್ತಾರೆ. ಮಂತ್ರಗಳು, ಪ್ರಾರ್ಥನೆಗಳು ಪಂಚಭೂತಗಳಲ್ಲಿ ಅವು ಲೀನವಾಗುತ್ತಿವೆ, ಜಗತ್ತಿಗೆ ಒಳಿತಾಗುತ್ತಿದೆ ಎಂಬ ವಿಶ್ವಾಸ ಇಲ್ಲಿನ ಜನರದ್ದು.
ಹಾಗೆಯೇ ಇಲ್ಲಿನ ಎತ್ತರದ ಬೆಟ್ಟದ ಪ್ರದೇಶಗಳಲ್ಲಿ ರಸ್ತೆಯ ಪಕ್ಕ ಕಾಣಸಿಗುವ ಬಿಳಿಯ ಬಣ್ಣದ ಲಂಬ ಧ್ವಜಗಳನ್ನು ಕಟ್ಟುವುದು, ಮರಣ ಹೊಂದಿದವರ ಜೀವನ್ಮುಕ್ತಿ ಕ್ರೆಯೆಯ ವಿಧಿವಿಧಾನಗಳಲ್ಲಿ ಒಂದು.
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ