ಬೆಂಕಿ ಕಡ್ಡಿ ಆಟ

ಸುತ್ತ ಮುತ್ತ ಎಲ್ಲಾ ಕಡೆಗೂ ಸ್ಕ್ರೀನ್ ಇರುವಾಗ, ಮಕ್ಕಳಿಗೆ ಟೀವಿ ನೋಡಬೇಡಿ, ಮೊಬೈಲ್ ನೋಡಬೇಡಿ ಅಂತ ಹೇಳ್ತಿದ್ರೆ, ಮನೇಲಿರೋ ಮಕ್ಕಳಾದರೂ ಏನು ಮಾಡಬೇಕು? ಹೊರಾಂಗಣ ಆಟಕ್ಕೆ ಅವಕಾಶ, ಸಮಯ ಸಂದರ್ಭ, ಸ್ನೇಹಿತರು ಇತ್ಯಾದಿ ಇದ್ದಾಗ ಓಕೆ ಒಪ್ಪಬಹುದು. ಮನೇಲಿದ್ದಾಗ ಮಕ್ಕಳ ಜೊತೆ ಏನೇನು ಆಟಗಳನ್ನು ಆಡಬಹುದು? ಆಟದ ಸಾಮಾನುಗಳನ್ನು ತಂದು ಪೂರೈಸುವುದು ಹೌದ? ಎಂಬಿತ್ಯಾದಿ ಯೋಚನೆಗಳು ನಮಗೂ ಒಂದು ಸಲ ತಲೆ ಕೆರೆದುಕೊಳ್ಳುವಂತೆ ಮಾಡುತ್ತೆ ಅಲ್ವ? ಹಿಂಗಿದ್ದೇ ಒಂದು ಟೈಮ್ ಪಾಸ್ ಆಟ, ಆದ್ರೆ ತಲೆಗೆ ಭಾರೀ ಕೆಲಸ ಕೊಡುವ ಆಟ, ನಮ್ಮ ಬಾಲ್ಯದ ಚೀಪ್ ಅಂಡ್ ಬೆಸ್ಟ್ ಆಟ - ಬೆಂಕಿ ಕಡ್ಡಿ ಆಟ!

ದೇವರಿಗೆ ದೀಪ ಹಚ್ಚಲು, ಅಡುಗೆ ಮನೇಲಿ ಮ್ಯಾಚ್ ಬಾಕ್ಸೆನ್ತು ಸಾಮಾನ್ಯ ಎಲ್ಲರ ಮನೆಯಲ್ಲಿ ಇದ್ದೇ ಇರುತ್ತದೆ. ಅಷ್ಟೇ ನಮ್ಮ ಆಟದ ವಸ್ತು :) ಬೆಂಕಿ ಕಡ್ಡಿ ಬಳಸಿ, ಸಂಖ್ಯೆಗಳ ಸಮೀಕರಣ ಬಗೆಹರಿಸುವುದೇ ನಮ್ಮ ಆಟ. ಯಾವ ವಯಸ್ಸಿನವರಿಗೆ ಈ ಆಟ ಅಂತ ಕೇಳಿದ್ರ? ಪ್ಲಸ್ಸು ಮೈನಸ್ಸು  ಲೆಕ್ಕ ಗೊತ್ತಿರೋ ಎಲ್ಲ ಸಣ್ಣ ದೊಡ್ಡ ಮಕ್ಕಳಿಗೆ ಈ ಆಟ. ಒಂದಷ್ಟು ಬೆಂಕಿ ಕಡ್ಡಿಗಳ ಜೋಡಿಸಿ ಅಂಕೆಗಳ ಮಾದರಿ ಮಾಡಿ, ಕೂಡು ಕಳೆಯೋ ಲೆಕ್ಕಾಚಾರದ ರಸಪ್ರಶ್ನೆ ಹಾಕಿ, ಒಂದೆರಡು ಕಡ್ಡಿಗಳ ಮಾತ್ರ ಬದಲಾಯಿಸಿ ಬಗೆಹರಿಸಬೇಕು ಎಂದು ಕೇಳಿ, ತಲೆಗೆ ಸ್ವಲ್ಪ ಕೆಲಸ ಕೊಡುವುದೇ ಈ ಆಟ ಆಡುವ ಬಗೆ.  ಚಿಕ್ಕಂದಿನಲ್ಲಿ ಈ ಆಟದ ಪ್ರಶ್ನೆ ಹಾಕುವವರೇ ದೊಡ್ಡ ಗಣಿತ ಶಾಸ್ತ್ರಜ್ಞರಂತೆ ಅನ್ನಿಸ್ತಿತ್ತು. ಕೇವಲ ಒಂದು ೧೦-೧೨ ಬೆಂಕಿ ಕಡ್ಡಿ ಇವತ್ತು ನಾವು ಮನೆಯ ಮೂರೂ ಜನರ ೫೦ ನಿಮಿಷವನ್ನು ಹಿಡಿದಿಟ್ಟಿತ್ತು ಎಂದರೆ ನಂಬುತ್ತೀರ!? ಆಡುವ ಬಗೆಗೆ ಒಂದು ಪುಟ್ಟ ಮಾಹಿತಿ ಕೆಳಗಿದೆ, ಮತ್ತೊಂದಷ್ಟು ಪ್ರಶ್ನೆಗಳು ನಿಮ್ಗೂ ಕೂಡ! ಇಂಟರ್ನೆಟ್ ಸಹಾಯ ಇಲ್ಲದೇ ಉತ್ತರ  ಕಂಡು ಹಿಡೀಬೇಕು ಗೊತ್ತಾಯ್ತಾ ?ಹಾಂ! ನೋ ಚೀಟಿಂಗ್!🤗🤗

#ನಮ್ಕಾಲದಾಟ #ಬೆಂಕಿಕಡ್ಡಿಆಟ #ಸಾನ್ವಿಸ್ಟೋರಿ #childhoodgames #brainteasers