ಮಕ್ಕಳ ಪರೀಕ್ಷಾ ಸಮಯ. ಸ್ಕೂಲಿಗೆ ರಜಾ, ಮಕ್ಕಳಿಗೆ ಮಜಾ.. ಓದಲಿಕ್ಕೆ ಕೂರಲು ಅವರಿಂದಾಗದು. ಓದದೇ ಕುಣಿಯಲು ಬಿಡಲು ನಮ್ಮಿಂದಾಗದು. ಈಗೆಂತು ಮಕ್ಕಳಿಗೆ ಪರೀಕ್ಷೆಗೆ ಓದಲು ಕುಳಿತರೆ ಬೋರ್ ಆಗಿಯೇ ಹಸಿವು ಜಾಸ್ತಿ. ಗಂಟೆಗಂಟೆಗೆ ಏನಾದರೂ ತಿನ್ನಲು ಕೊಡಬೇಕು.. ಹೊರಗಡೆಯ ಆಹಾರ ನೀಡಿ, ಪರೀಕ್ಷಾ ಸಮಯದಲ್ಲಿ ತೊಂದರೆ ತೆಗೆದುಕೊಳ್ಳಲು ನಮಗೆ ಇಷ್ಟವಿರುವುದಿಲ್ಲ. ಅದರಲ್ಲೂ ಮುಖ್ಯವಾಗಿ ಮಕ್ಕಳ ಬಾಯಿ ಬಡುಗೆಗೆ ಅಂಗಡಿಯಿಂದ ತಂದ ಪೊಟ್ಟಣ ಆಹಾರವೆಂತೂ ಅವಶ್ಯಕತೆಕಿಂತ ಹೆಚ್ಚಿನ ಸಕ್ಕರೆ ಮತ್ತು ಕೆಟ್ಟ ಜಿಡ್ಡಿನ ಅಂಶದ್ದಾಗಿದ್ದು, ಮಕ್ಕಳಿಗೆ ಓದಲು ಮನಸ್ಸಾಗದಂತೆ ಇನ್ನಷ್ಟು ಆಲಸ್ಯತನವನ್ನು ಒಡ್ಡುತ್ತದೆ. ಹಾಗಾಗಿ ಮನೆಯಲ್ಲಿಯೇ ಅದು ಇದು 'ತಿನ್ನಕ್ಕೇನಿದ್ದು' ಗೆ ಏನಾದ್ರೂ ವ್ಯವಸ್ಥೆ ಮಾಡಬೇಕಲ್ಲ. ಹೀಗೊಂದು ಇವತ್ತಿನ ರೆಸಿಪಿ ಬರೆದಿಟ್ಟು ಹಂಚುವ ಎನಿಸಿತು. ಇದು ಮಕ್ಕಳನ್ನು ಓದಲು ಕೂರಿಸಿಕೊಂಡು ಪ್ರಶ್ನೋತ್ತರ ಕೇಳುವ ಸಮಯದಲ್ಲೇ ಮಾಡಬಹುದಾದ ಒಂದು ಸುಲಭವಾದ ಪೌಷ್ಟಿಕವಾದ ಹಲ್ವಾ.
ವಿ.ಸೂ : ಇದು ನನ್ನ ಸಸ್ಯಜನ್ಯ ಆಹಾರದ ರೆಸಿಪಿ
ಒಂದು ದೊಡ್ಡ ಕಪ್ ಗೋಡಂಬಿ ಒಂದು ಗಂಟೆಗಳ ಕಾಲ ನೆನೆಸಿಕೊಂಡು, ಕನಿಷ್ಠ ನೀರಿನಲ್ಲಿ ಮಿಕ್ಸರ್ ಗ್ರೇನ್ದರ್ ಗೆ ಹಾಕಿ ಬೀಸಿಟ್ಟುಕೊಳ್ಳಬೇಕು.
ಸಣ್ಣಗೆ ತುರಿದ ಕ್ಯಾರೆಟ್ ಅರ್ಧ ಕಪ್
ತುರಿದ ಕಾಯಿ ಕಾಲು ಕಪ್ (ಹಲ್ವಾ ತರಿತರಿಯಾದ ಟೆಕ್ಸ್ಚರ್ಬೇಕಿದ್ದಲ್ಲಿ)
ನಾಲ್ಕು ಚಮಚ ಸಕ್ಕರೆ.
ಬಿಸಿನೀರಿನಲ್ಲಿ ಕುದಿಸಿ, ಆರಿಸಿ, ಮಿಕ್ಸರ್ನಲ್ಲಿ ಬೀಸಿದ ಖರ್ಜೂರ ಹಣ್ಣಿನ ಪೇಸ್ಟ್ ಒಂದು ಕಪ್. ( ಬಿಳಿ ಸಕ್ಕರೆಯ ಕಡಿಮೆ ಬಳಸುವ ಉದ್ದೇಶದಿಂದ)
ಕತ್ತರಿಸಿದ ಬಾದಾಮಿಯ ಸಣ್ಣ ಚೂರುಗಳು, ಹಲ್ವದ ಡೆಕೋರೇಷನ್ ಗೆ ಇಡೀ ಗೋಡಂಬಿ ೧೦-೧೫
ಜಿಡ್ಡಿನ ಅಂಶಕ್ಕೆ ೪-೫ ಚಮಚೆ ಕೊಬ್ಬರಿ ಎಣ್ಣೆ.
ಬಾಣಲೆಗೆ ಒಂದೆರಡು ಚಮಚೆ ಕೊಬ್ಬರಿ ಎಣ್ಣೆ ಹಾಕಿ, ಬಾದಾಮಿಯ ಚೂರುಗಳನ್ನು ಹಾಕಿ ಸಣ್ಣ ಉರಿಯಲ್ಲಿ ಹುರಿದುಕೊಂಡು, ಅದಕ್ಕೆ ತುರಿದ ಕ್ಯಾರೆಟ್ ಹಾಕಿ ಒಂದೈದು ನಿಮಿಷಗಳ ಕಾಲ ಹಸಿ ಅಂಶ ಹೋಗುವಷ್ಟು ಹುರಿದುಕೊಂಡು ಅದಕ್ಕೆ ಗೋಡಂಬಿ ಪೇಸ್ಟ್, ಖರ್ಜೂರದ ಪೇಸ್ಟ್, ೩-೪ ಚಮಚ ಸಕ್ಕರೆ ಎಲ್ಲವನ್ನೂ ಹಾಕಿ ಹದವಾಗಿ ಮಿಶ್ರಣ ಮಾಡಿಕೊಂಡು ಕೈಯಾಡಿಸುತ್ತ ಬರಬೇಕು. ಹಲ್ವಕ್ಕೆ ಹೆಚ್ಚಿನ ಬಿಳಿಸಕ್ಕರೆ ಬಳಸುವುದು ಬೇಡ ಎಂದು ಖರ್ಜೂರ ಹಾಕಿರುವುದರಿಂದ ಅದು ಬಲು ಬೇಗ ತಳ ಹಿಡಿಯುವ ಸಾಧ್ಯತೆ ಇರುತ್ತದೆ. ಸಾಧ್ಯವಾದಷ್ಟು, ಸಣ್ಣ ಉರಿಯಲ್ಲಿ ನಿರಂತರವಾಗಿ ಸೌಟಿನಿಂದ ಕೈಯಾಡಿಸುತ್ತಲೇ ನಾನೆಂತೂ ಅಷ್ಟರಲ್ಲಿ ಮಗಳ ಪರೀಕ್ಷೆಯ ಪುನರಾವರ್ತನೆ ಮುಗಿಸಿಕೊಂಡೆ. ಹಲ್ವಾ ತುಸು ಗಟ್ಟಿಯಾಗುವ ಹಂತಕ್ಕೆ ಬಂದಾಗ, ಒಂದೆರಡು ಚಮಚೆ ಕೊಬ್ಬರಿ ಎಣ್ಣೆ ಹಾಕಿಕೊಂಡು ಹಲ್ವಾ ಪಾತ್ರೆಗೆ ಹಿಡಿಯದಂತೆ ಮಾಡಬಹುದು. ಅಮ್ಮ ನನಗಾಗಿ ಏನೋ ಮಾಡುತ್ತಿದ್ದಾಳೆ, ಘಮ್ ಎನ್ನುವ ಪರಿಮಳವ ಹೀರುತ್ತಾ, ಮಗಳು ಉತ್ತರಿಸಿ ಮುಗಿಯುವದೋರಳಗಾಗಿ ರುಚಿಯಾದ ಹಲ್ವಾ ತಯಾರು. ಗಟ್ಟಿಯಾದ ಹಲ್ವಾವನ್ನು, ಎಣ್ಣೆ ಸವರಿದ ತಟ್ಟೆಯೊಂದಕ್ಕೆ ಹರಡಿಕೊಂಡು, ಮೇಲಿನಿಂದ ಹುರಿದ ಗೋಡಂಬಿಯ ಸಿಂಗರಿಸಿ, ಚಾಕುವಿನಲ್ಲಿ ಕಟ್ ಮಾಡಿ ಖುಷಿ ಪಟ್ಟಳು ಮಗಳು.
ಯಾವುದೇ ಹಿಟ್ಟನ್ನು ಹಾಕದಿರುವುದರಿಂದ, ಈ ಹಲ್ವಾ ಮೆತ್ತಗಿರುತ್ತದೆ. ಎರಡ್ಮೂರು ದಿನದ ಮಟ್ಟಿಗೆ ಫ್ರಿಡ್ಜ್ ಅಥವಾ ಫ್ರೀಜರ್ ನಲ್ಲಿಟ್ಟು ಬಳಸಬಹುದು. ಮಕ್ಕಳಿಗೆ ಬಾಯಾಡಲು ರುಚಿ ಮತ್ತು ಪೌಷ್ಟಿಕ ಆಹಾರವಿದು.
ಕಾಮೆಂಟ್ಗಳಿಲ್ಲ:
ಕಾಮೆಂಟ್ ಪೋಸ್ಟ್ ಮಾಡಿ