ಮಕ್ಕಳ ಪರೀಕ್ಷಾ ತಯಾರಿ - ವಿರಾಮದ ಆಟಗಳು

 ಮಕ್ಕಳ ಪರೀಕ್ಷಾ ತಯಾರಿ - ವಿರಾಮದ ಆಟಗಳು :

ಮಕ್ಕಳಿಗೀಗ ಪರೀಕ್ಷಾಸಮಯ. ತುಸು ಹೆಚ್ಚೇ ಓದುವ ಸಮಯ ಬೇಕು. ಕಲಿಕೆ, ಮನನ, ಪುನರಾವರ್ತನೆ ಎಂದು ಅಧಿಕ ಸಮಯ ಕುಳಿತು ಓದುವ ಅನಿವಾರ್ಯತೆ. ಯುದ್ಧಕಾಲೇ ಶಸ್ತ್ರಾಭ್ಯಾಸ ಮಾಡುವ ಅದೆಷ್ಟೋ ಮಕ್ಕಳಿಗೆ ಈಗ ಒಂದೇ ಸಲಕ್ಕೆ ಓದಿ ಅರಗಿಸಿಕೊಳ್ಳುವ ಸವಾಲು. ಇಂತಹ ಸಮಯದಲ್ಲಿ ನಿರಂತರವಾಗಿ ಓದುವ ಮಕ್ಕಳಿಗೆ ಮಧ್ಯೆ ಮಧ್ಯೆ ವಿರಾಮ ಬೇಕಾಗುತ್ತದೆ. ಸಣ್ಣ ಸಣ್ಣ ವಿರಾಮದ ಸಮಯದಲ್ಲಿ ಮಕ್ಕಳಿಗೆ ಸಂತೋಷವೂ ಆಗಬೇಕು, ಹಾಗೆಯೆ ಅವರ ಬುದ್ಧಿಗೆ ವ್ಯಾಯಾಮವೂ ಆಗುವಂತಹ ಒಂದಷ್ಟು ಮಕ್ಕಳ ಆಟಗಳು, ಮಕ್ಕಳಿಗೂ ಮಕ್ಕಳನ್ನು ಪರೀಕ್ಷೆಗೆ ತಯಾರು ಮಾಡುತ್ತಿರುವ ಪಾಲಕರಿಗೂ..

ರೇನ್ಬೋ ಆಟ :

ನೆಲ, ಬೋರ್ಡ್ ಅಥವಾ ಒಂದು ಪೇಪರ್ರಿನ ಮೇಲೆ, ಕೆಳಗೆ ಕಾಣುವಂತೆ ಐದರಿಂದ ಏಳು ಮನೆಗಳ ಚೌಕಟ್ಟನ್ನು ಚಿತ್ರಿಸಿಕೊಳ್ಳಿ. ಈಗ ಮಗುವಿಗೆ ಕಣ್ಣು ಕಟ್ಟಿ. ವಿವಿಧ ಬಣ್ಣಗಳು ಕಾಣುವಂತಹ ಯಾವುದೇ ವಸ್ತು ಉದಾಹರಣೆಗೆ, ಸ್ಕೇಚ್ಪೆನ್ಸ್, ಕ್ರೆಯಾನ್ಸ್, ಲೆಗೋ ಬಿಲ್ಡಿಂಗ್ಆ ಬ್ಲಾಕ್ಸ್ ಇನ್ನಿತರ ಯಾವುದೇ ಬಣ್ಣದ ವಸುಗಳನ್ನು ಚಿತ್ರದಲ್ಲಿ  ತೋರಿಸಿದಂತೆ ಮನೆಗಳಲ್ಲಿ ಜೋಡಿಸಿಡಿ. ಮಗುವಿಗೆ ಕಣ್ಣಿಗೆ ಕಟ್ಟಿದ ಬಟ್ಟೆ ತೆಗೆದು, ೫ - ೮ ಸೆಕೆಂಡುಗಳ ಕಾಲ, ನೋಡಲು ತಿಳಿಸುವುದು. ಆನಂತರ ಮತ್ತೆ ಮಗುವಿಗೆ ಕಣ್ಣು ಮುಚ್ಚಲು ಹೇಳಿ, ಈ ಎಲ್ಲ ಬಣ್ಣದ ವಸ್ತುಗಳನ್ನು ತೆಗೆದು ಬದಿಯಲ್ಲಿ ಇಡುವುದು. ಈಗ ಸವಾಲು ತಯಾರು. ಮುಂಚೆ ನೋಡಿದ ಮಾದರಿಯಲ್ಲಿಯೇ ಮಗು ಬಣ್ಣದ ವಸ್ತುಗಳನ್ನು ಜೋಡಿಸಿಡಬೇಕು. ಆಟಕ್ಕೆ ಆಟ, ಬುದ್ಧಿಗೆ ಕಸರತ್ತು 

ಸುಡುಕೊ :

ಸುಡುಕೊ ಒಂದು ಜನಪ್ರಿಯ ಸಂಖ್ಯೆಯ ಒಗಟಿನ ಆಟ ಎನ್ನಬಹುದು. ೯X ೯ ಗ್ರಿಡ್ ಅನ್ನು ಅಂಕೆಗಳಿಂದ ತುಂಬಬೇಕು. ಅಲ್ಲಲ್ಲಿ ಕೆಲವೊಂದು ಸಂಖ್ಯೆಗಳನ್ನು ಮೊದಲೇ ಬರೆದಿರಲಾಗುತ್ತದೆ. ಅದನ್ನು ಗಮನಿಸುತ್ತಾ, ನಿಯಮದಂತೆ, ಅಡ್ಡ ಸಾಲು ಮತ್ತು ಉದ್ದ ಸಾಲಿನಲ್ಲಿ ೧ ರಿಂದ ೯ ವರೆಗಿನ ಸಂಖ್ಯೆ ಎಲ್ಲಿಯೂ ಪುನರಾವರ್ತನೆ ಆಗದಂತೆ ಭರ್ತಿ ಮಾಡಬೇಕು. ನಾವು ಭರ್ತಿ ಮಾಡುವ ಸಂಖ್ಯೆಗಳು, ಯಾವುದೇ  ೩X ೩ ರ  ಚೌಕಿಮನೆಯಲ್ಲಿಯೂ  ೧ ರಿಂದ ೯ ವರೆಗಿನ ಸಂಖ್ಯೆಗಳಲ್ಲಿಯೇ ಭರ್ತಿಯಾಗಿರಬೇಕು ಎಂಬ ಇನ್ನೊಂದು ನಿಯಮವೂ ಇದೆ. ಇದು ಮಕ್ಕಳ ಮೆದುಳನ್ನು ಚುರುಕು ಮಾಡಲು ಜೊತೆಗೆ ಓದಿನಿಂದ ವಿರಾಮ ಸಿಕ್ಕಂತೆಯೂ ಕಾಣುವ ಮಜವಾದ ಆಟ. 

ಹನುಮತನ ಬಾಲ :

ಈ ಆಟದಲ್ಲಿ ನಾವು ಮೊದಲಿಗೆ ಸೂಚಿಸಿಕೊಂಡಂತೆ ಯಾವುದಾದರೂ ಒಂದು ವಿಷಯವನ್ನು ಕುರಿತಾಗಿ ಅದಕ್ಕೆ ಸಂಬಂಧಿಸಿದ ಪದಗಳ ಒಂದಕ್ಕೊಂದು ಜೋಡಿಸುತ್ತಾ ಪುನರಾವರ್ತಿಸುವ  ಬಂಡಿಯಾಟ. ಉದಾಹರಣೆಗೆ, ಪ್ರಾಣಿಗಳು ಎಂದಾದರೆ, ಒಬ್ಬ ವ್ಯಕ್ತಿ "ಹುಲಿ" ಎಂದರೆ, ಎರಡನೇ ವ್ಯಕ್ತಿ, " ಹುಲಿ, ಸಿಂಹ" ಎನ್ನಬೇಕು. ಮತ್ತೆ ಮೊದಲನೇ ವ್ಯಕ್ತಿ,  ಈ ವ್ಯಕ್ತಿ ಸೇರಿಸಿಕೊಂಡ ಪ್ರಾಣಿಯ ಹೆಸರನ್ನೂ ನೆನಪಿಟ್ಟುಕೊಂಡು ಅದಕ್ಕೆ ತಾನೊಂದು ಪದ ಸೇರಿಸಿ ಹೇಳಬೇಕು, "ಹುಲಿ, ಸಿಂಹ, ಎಮ್ಮೆ" ಎಂದು. ಹೀಗೆ ಪದಗಳ ಬಂಡಿ, ನೆನಪಿನ ಶಕ್ತಿಯ ಪ್ರಯೋಗ ಮುಂದುವರೆಯುತ್ತ ಹೋಗುತ್ತದೆ. 

ಅಕ್ಷರ ಮಣಿಸರ : 

ಈ ಆಟದಲ್ಲಿ ಮಕ್ಕಳಿಗೆ ಒಂದಷ್ಟು ಸುಲಭದ ಸ್ವರ ಮತ್ತು ವ್ಯಂಜನಗಳನ್ನು ಬರೆದುಕೊಟ್ಟು ಅದರಿಂದ ಸಾಧ್ಯವಾದಷ್ಟು ಪದಗಳನ್ನು ಮಾಡಲು ತಿಳಿಸುವುದು. ಇಂಗ್ಲೀಷ್ ಅಕ್ಷರಗಳನ್ನೂ ಕೂಡ ಇದೇ ಮಾದರಿಯಲ್ಲಿ ಸಣ್ಣ ದೊಡ್ಡ ಪದಗಳನ್ನು ಮಾಡಲು ನೀಡಬಹುದು.

ಉದಾ : ಆ ಸ ಟ ಗ ರ ಅ ಪ
              ಆಟ, ಆಗಸ. ಅಗಸ, ಅರ, ಪಟ, ಗರಗಸ, ಸರ ಇತ್ಯಾದಿ

             M T A E S I R
             mat, meat, sit, sir, ate, seat, sim, sire, team etc

ಮೂರು ಪದ ಒಂದು ಕಥೆ :

ಮಕ್ಕಳಿಗೆ ಅವರ ವಯಸ್ಸಿನ ಮಿತಿಗೆ ಅನುಗುಣವಾಗಿ, ಸುಲಭವಾಗಿ ಮಕ್ಕಳು ಗುರುತಿಸಲ್ಪಡುವ ಯಾವುದಾದರೂ ಮೂರು ಪದಗಳನ್ನು ಕೊಟ್ಟು, ಅವುಗಳನ್ನು ಬಳಸಿ ಕಥೆಯೊಂದನ್ನು ಹೆಣೆಯಲು ತಿಳಿಸಬೇಕು. ೫-೬ ವರ್ಷದ ಮಕ್ಕಳ ಕಥೆ ಅರ್ಥಪೂರ್ಣವಾಗಿಯೇ ಇರಬೇಕೆಂಬ ಅಪೇಕ್ಷೆಯಿಲ್ಲ. ಮಕ್ಕಳಿಗೆ ಆ ಪದಗಳನ್ನು ಬಳಸಿ ವಾಕ್ಯ ರಚನೆ ಮಾಡುವುದು ಮತ್ತು ಒಂದಕ್ಕೊಂದು ಸಂಬಂಧ ಹೆಣೆಯುವ ಚಾಕ್ಷತೆ ಸಿಕ್ಕರೆ ಸಾಕು. ಓದಿನ ಒತ್ತಡದಿಂದ ಹೊರಬಂದು ಕಲ್ಪನೆಯ ಯೋಚನೆಗಳನ್ನು ಮಕ್ಕಳು ಕೈಗೊಂಡರೆ, ಅದುವೇ ವಿಶ್ರಾಂತಿಯ ಭಾವವಾಗುತ್ತದೆ.  

ಉದಾ : ಮೋಡ, ನೀರು, ಛತ್ರಿ
              ಕಾಗೆ, ನರಿ, ರೊಟ್ಟಿ

ಒಂದು ಹುಂಡಿ ಅಕ್ಷರ - 

ಈ ಆಟವನ್ನು ಬಾಯ್ದೆರೆಯಾಗಿಯೂ ಆಡಬಹುದು ಅಥವಾ ಬರೆದು ಕೂಡ ಆಡಬಹುದು. ಯಾವುದಾದರೊಂದು ಕನ್ನಡ ಅಕ್ಷರವನ್ನು ಮಗುವಿಗೆ ನೀಡುವುದು. ಆ ಅಕ್ಷರ ಅಥವಾ ಅದರ ಕಾಗುಣಿತಾಕ್ಷರದಿಂದ ಉಚ್ಚಾರವಾಗುವ ಎಲ್ಲ ಪದಗಳನ್ನು ಮಗುವು ಎರಡು ಅಥವಾ ಮೂರು ನಿಮಿಷದ ಸಮಯದಲ್ಲಿ ಹೇಳುತ್ತಾ ಹೋಗಬೇಕು. ಪರೀಕ್ಷೆಯಲ್ಲಿ ಕಡಿಮೆ ಅವಧಿಯಲ್ಲಿ ಇನ್ನೆಷ್ಟು ಬರೆಯಬೇಕು ಎಂಬ ಅಂದಾಜು ಮಕ್ಕಳಿಗೆ ಈ ರೀತಿಯ ಆಟಗಳಿಂದ ಸಿಗುತ್ತದೆ. ಇಂಗ್ಲಿಷ್ ಪದಗಳನ್ನೂ ಕೂಡ ಇದೆ ರೀತಿಯಲ್ಲಿ ಹುಡುಕಿ ಹೇಳಬಹುದು. ಸ್ವಲ್ಪ ದೊಡ್ಡ ಮಕ್ಕಳಿಗಾದರೆ ಸಮಯದ ಗಡುವು ನೀಡಿ ಅವರ ಚುರುಕುತನ ಪರೀಕ್ಷಿಸಬಹುದು.

ಉದಾ : ೧೦ ನಿಮಿಷಗಳಲ್ಲಿ 'ರ' ಅಕ್ಷರದಿಂದ ಪ್ರಾರಂಭವಾಗುವ ಪದಗಳನ್ನು ಹುಂಡಿಗೆ ಹಾಕು
              'ವ' ಕಾಗುಣಿತಾಕ್ಷರದ ಎಲ್ಲ ಪದಗಳನ್ನು ಬರೆಯೋಣ ಇತ್ಯಾದಿ

ಮೆಮೊರಿ ಚಾಲೆಂಜ್ :

ಒಂದೊಂದು ಚೀಟಿಯಲ್ಲಿ ಅನಿರ್ಧಿಷ್ಟವಾಗಿ ಮನೆಯ ಅಥವಾ ಸುತ್ತಮುತ್ತಲಿನ ವಸ್ತುಗಳ ಒಂದು ೧೦ ಹೆಸರುಗಳನ್ನು ಬರೆದಿಡುವುದು. ಈ ರೀತಿಯ ಅನೇಕ ಚೀಟಿಗಳನ್ನು ಮಾಡಿಡುವುದು. ಎಲ್ಲ ಚೀಟಿ ಹಾರಿಸಿ ಮಗುವಿಗೆ ಒಂದು ಆಯ್ಕೆ ಮಾಡಲು ಹೇಳಿ, ಸಿಕ್ಕ ಚೀಟಿಯನ್ನು ೨೦ ಸೆಕೆಂಡುಗಳ ಕಾಲ ಓದಿ ಮನನ ಮಾಡಿಕೊಂಡು ನಂತರ ನೋಡದೆ ಆ ಹೆಸರುಗಳನ್ನು ಹೇಳಲು ತಿಳಿಸುವುದು. 

ಚೆಂಡಿನಾಟ :

ಪುಟಿಯುವ ಚೆಂಡನ್ನು ಗೋಡೆಗೆ ಚಿಮ್ಮಿಸಿ ಕೆಳಗಡೆ ಬೀಳದಂತೆ ಕ್ಯಾಚ್ ಹಿಡಿಯುವುದು ಮತ್ತು ೨ ನಿಮಿಷದಲ್ಲಿ ಯಾರು ಹೆಚ್ಚಿನ ಸಲ ಚೆಂಡನ್ನು ಹಿಡಿಯುತ್ತಾರೆ ಎಂಬಿತ್ಯಾದಿ ಆಟಗಳು ಮಕ್ಕಳ ಏಕಾಗ್ರತೆ ಹೆಚ್ಚಿಸಲು ಸಹಾಯಕವಾಗುತ್ತದೆ.