ಇನ್ನೇನು ಮಕ್ಕಳ ಬೇಸಿಗೆ ರಜೆಪ್ರಾರಂಭವಾಗಲಿದೆ. ಮಕ್ಕಳ ಪಾಲಿಸಬೇಕಾದ ನಿತ್ಯದ ದಿನಚರಿಯಿಂದ ವಿರಾಮವನ್ನು ನೀಡುತ್ತದೆ. ಮಕ್ಕಳು ದೈಹಿಕವಾಗಿ, ಮಾನಸಿಕವಾಗಿ ವಿಶ್ರಮಿಸಲು, ಹೊಸ ವಿಷಯಗಳ ಅನ್ವೇಷಿಸಲು ಮತ್ತು ಶಾಶ್ವತವಾದ ನೆನಪುಗಳನ್ನು ರಚಿಸಲು ಉತ್ತಮ ಸಮಯ. ಇಂತಹ ದಿನಗಳಲ್ಲಿ ಮಕ್ಕಳನ್ನು ಪ್ರೋತ್ಸಾಹಿಸಬಹುದಾದ ಚಟುವಟಿಕೆಗಳಲ್ಲಿ ಅಡುಗೆಯೂ ಒಂದು. ಮಕ್ಕಳನ್ನು ಅಡುಗೆ ಮನೆಯಿಂದ ಹೊರಗಿಡುವ ದಿನಗಳು ಹೋಗಿವೆ. ಇಂದಿನ ಪಾಲನೆ ಶೈಲಿಯು ಮಕ್ಕಳು ಅಡುಗೆ ಮತ್ತು ಶುಚಿಗೊಳಿಸುವಿಕೆಯ ಕೌಶಲ್ಯಗಳನ್ನು ಕಲಿತಿರಬೇಕು ಎನ್ನುತ್ತದೆ. ಅಡುಗೆ ಲಿಂಗ ನಿರ್ಧಿಷ್ಟವೇನಲ್ಲ. ಅದು ಕೇವಲ ಹೊಟ್ಟೆ ತುಂಬಿಸುವ ಕಾರ್ಯವಲ್ಲದೆ, ವ್ಯಕ್ತಿತ್ವ ಅಭಿವೃದ್ಧಿಗೆ ಸಹಾಯ ಮಾಡುವಂತಹ ಹವ್ಯಾಸ. ಇದನ್ನು ಚಿಕ್ಕಂದಿನಿಂದಲೇ ಅನುಸರಿಸುವುದರಿಂದ ಮಕ್ಕಳು ಬಹಳಷ್ಟು ವಿಷಯಗಳನ್ನು ಕಲಿಯಬಹುದು.
ಮಕ್ಕಳು ಅಡುಗೆ ಕಲಿಯುವುದರ ಉಪಯೋಗ :
ಪ್ರಾಯೋಗಿಕ ಜ್ಞಾನ : ಅಡುಗೆ ಪದಾರ್ಥವನ್ನು ಮಾಡಲು ಬೇಕಾಗುವ ಸಲಕರಣೆಗಳ ಕುರಿತಾದ ಜ್ಞಾನ ವೃದ್ಧಿಯಾಗುತ್ತದೆ.
ಸಂಯೋಜನಾ ಕೌಶಲ್ಯ ಮತ್ತು ಗ್ರಹಿಕೆ : ಆಹಾರ ವಸ್ತುಗಳ ಎತ್ತುವ, ಮಡಚುವ, ಮಗಚುವಾಗ ಕಣ್ಣು ಕೈಗಳ ಸಂಯೋಜನೆ, ಹಿಟ್ಟನ್ನು ಕಲೆಸುವಾಗ, ಕಾಯಿ ತುರಿಯಬೇಕಾದಾಗ, ತರಕಾರಿ ಹೆಚ್ಚುವಾಗ, ಕ್ಯಾರೆಟ್ ತುರಿಯುವಾಗ, ಬೆಂಕಿ ಹಚ್ಚುವಾಗ, , ಯಾವ ವಸ್ತು ಯಾವ ಪ್ರಮಾಣದಲ್ಲಿ ಹಾಕಬೇಕು, ಎಷ್ಟು ವಸ್ತುಗಳು ಬೇಕು, ೩ ಚಮಚ, ಒಂದು ಕಪ್, ೧೦ ಗ್ರಾಮ್ಸ್, ಅರ್ಧ ಲೀಟರ್ ಎಂಬಿತ್ಯಾದಿ ಗಣಿತದ ಕೌಶಲ್ಯದ ವೃದ್ಧಿಯಾಗುತ್ತದೆ. ಹೊಸ ಪದಗಳ ಬಳಕೆಗೆ ಅವಕಾಶವಾಗಿ, ಭಾಷಾ ಜ್ಞಾನ ಹೆಚ್ಚುತ್ತದೆ.
ಇಂದ್ರಿಯಗಳ ಬಳಕೆ : ವಾಸನೆ, ರುಚಿ, ಸ್ಪರ್ಶಜ್ಞಾನ ಇತ್ಯಾದಿ ತಮ್ಮ ಇಂದ್ರಿಯಗಳ ಅನ್ವೇಷಿಸಲು ಮಕ್ಕಳಿಗೆ ಅಡುಗೆ ಅನುವು ಮಾಡಿಕೊಟ್ಟಂತಾಗುತ್ತದೆ. ಸಾಂದ್ರತೆ, ಬೆರಿಕೆ, ಬೇಯುವುದು, ಹುರಿಯುವುದು, ಕಡೆಯುವುದು ಇತ್ಯಾದಿ ವಿಷಯಗಳನ್ನು ಕಣ್ಣು ಕಾಣುತ್ತದೆ. ಒಗ್ಗರಣೆ, ಕರಿಯುವುದು, ಬೆಂದಿರುವ ಆಹಾರ ಇತ್ಯಾದಿ ವಾಸನೆಗಳ ಮಕ್ಕಳು ನೋಡಿದಾಗ ಮಕ್ಕಳ ಘರಾನಾ ಇಂದ್ರಿಯ ಚುರುಕಾಗುತ್ತದೆ. ರುಚಿಯನ್ನು ಧೃಡೀಕರಿಸಿಕೊಳ್ಳುತ್ತ ಮಕ್ಕಳು ಅಡುಗೆಯ ಕೌಶಲ್ಯವನ್ನು ಸುಧಾರಿಸಿಕೊಳ್ಳುತ್ತ ಹೋಗುತ್ತಾರೆ. ಅಡುಗೆಮನೆಯಲ್ಲಿ ಕೆಲಸ ಮಾಡುವುದು ಮಗುವಿನ ಸರ್ವತೋಮುಖ ಬೆಳವಣಿಗೆಗೆ ಅತ್ಯುತ್ತಮ ಮೂಲವಾಗಿದೆ.
ಕುಟುಂಬ ಸಂಪ್ರದಾಯಗಳು : ತಲೆಮಾರುಗಳಿಂದ ಬಂದಿರುವ ಆಹಾರದ ಪಾಕ ವಿಧಾನಗಳನ್ನು ಸಂರಕ್ಷಿಸಲು, ಅವುಗಳ ಬಳಕೆಯೇ ಸರಿಯಾದ ಮಾರ್ಗ. ಸಂಸ್ಕೃತಿ ಪರಂಪರೆಗಳನ್ನು ಮೆರೆಯುವಲ್ಲಿ ನಾವು ಸ್ಥಳೀಯವಾಗಿ ತಿನ್ನುವ ಆಹಾರವೂ ಕೂಡ ಪ್ರಮುಖ ಪಾತ್ರ ವಹಿಸುತ್ತದೆ. ಅಜ್ಜಿಯ ಕೈರುಚಿಯ ತೊವ್ವೆ, ಚಿಕ್ಕಪ್ಪನ ಮೈಸೂರು ಪಾಕದ ಹದ, ಅಪ್ಪ ಮಾಡುವ ಬಿರ್ಯಾನಿ, ಅಮ್ಮನ ಪೇಟೆಂಟ್ ತಂಬುಳಿ ಇತ್ಯಾದಿ ಮನೆಯ ಹಿರಿಯರಿಗೆ ಗೊತ್ತಿರುವ ಅಪರೂಪದ ಖಾದ್ಯಗಳನ್ನು, ತಿಂಡಿ ಅಡುಗೆಗಳನ್ನು ಮಾಡಲು ಕಲಿಯುವುದು ಕುಟುಂಬ ಬೇರುಗಳ ಅರಿವು ಸಿಗುವಂತೆ ಮಾಡುತ್ತದೆ.
ತಾಳ್ಮೆ, ಸ್ವಯಂ ಸುಧಾರಣೆಯ ಕಲಿಕೆ : ಬ್ರೆಡ್ ಮಾಡುವಾಗ ಹಿಟ್ಟು ಹುದುಗುವಿಕೆ, ಸಲಾಡ್ ಮಾಡಲು ಕಾಳುಗಳು ಮೊಳಕೆ ಒಡೆಯುವುದು, ಹಾಲು ಕಾಯಿಸುವುದು, ಎಣ್ಣೆ ಕಾಯುವುದು, ಸಿಪ್ಪೆ ತೆಗೆಯುವುದು ಇತ್ಯಾದಿ ಅಡುಗೆಯ ಸಾಕಷ್ಟು ಸಣ್ಣ ಪುಟ್ಟ ಕೆಲಸಗಳಲ್ಲಿಯೂ ತಾಳ್ಮೆ ಅತೀಮುಖ್ಯ. ಮಕ್ಕಳಿಗೆ ಕಾಯುವುದರ ಅರಿವಿನ ಜೊತೆಗೆ, ಅದೇ ಸಮಯದಲ್ಲಿ ಇನ್ಯಾವುದೋ ಮುಂದಿನ ಹಂತದ ತಯಾರಿ ಅಥವಾ ಉಳಿದ ಸ್ವಚ್ಛತೆಗಳನ್ನು ಮಾಡಿ ಮುಗಿಸಿಕೊಳ್ಳುವ ಪ್ಲಾನಿಂಗ್ ಸಿಗುತ್ತಾ ಹೋಗುತ್ತದೆ. ಪ್ರಾರಂಭದಲ್ಲಿ ಪ್ರಾಯೋಗಿಕ ಅಡುಗೆಗಳು ಶುಚಿ ರುಚಿಯಾಗಿ ಬರಲಿಕ್ಕಿಲ್ಲ. ತಾನೆಲ್ಲಿ ಎಡವಿದೆ ಹೇಗೆ ಅದನ್ನು ಸರಿ ಪಡಿಸಬಹುದು, ಮುಂದಿನ ಸಲ ಯಾವುದಕ್ಕೆ ಜಾಗರೂಕನಾಗಿರಬೇಕು ಎಂಬಿತ್ಯಾದಿ ಆತ್ಮಾವಲೋಕನ ಮಕ್ಕಳು ಮಾಡಿಕೊಳ್ಳಲು ಪ್ರಾರಂಭಿಸುತ್ತಾರೆ. ಅದು ಭವಿಷ್ಯದಲ್ಲಿ ಜೀವನದ ಅನೇಕ ಬಗೆಯ ಸವಾಲುಗಳಿಗೆ ತಮ್ಮನ್ನು ತಾವೇ ಆತ್ಮವಿಶ್ವಾಸದಿಂದ ಒಡ್ಡಿಕೊಳ್ಳಲು ಸಹಾಯ ಮಾಡುತ್ತದೆ.
ಆಹಾರದ ಬಗೆಗಿನ ಗೌರವ : ತಟ್ಟೆ ಮುಂದೆ ಕುಳಿತು ತಿಂಡಿ ಈಗಿಂದೀಗಲೇ ಬರಬೇಕು, ಬಿಸಿಯಿರಬೇಕು, ತಣ್ಣಗಿರಬೇಕು, ಖಾರ ಹೆಚ್ಚು, ಚೆನ್ನಾಗಿಲ್ಲ ಇತ್ಯಾದಿ ನಕಾರಾತ್ಮಕ ಟೀಕೆಗಳನ್ನು ನೀಡುವ ಮಕ್ಕಳು, ತಾವೇ ಸ್ವಯಂಪಾಕ ಮಾಡುವಾಗ ಅಡುಗೆ ತಯಾರಿಯಲ್ಲಿನ ಶ್ರಮವನ್ನು ಅರಿಯುತ್ತಾರೆ. ತಾವು ಸಮಯ ಮತ್ತು ಅನೇಕ ಸಾಮಗ್ರಿಗಳನ್ನು ಬಳಸಿ ಮಾಡಿದ ಅಡುಗೆ ಯಾರೂ ತಿನ್ನದೇ ಕಸದಬುಟ್ಟಿಗೆ ಹೋದರೆ ಅದೆಷ್ಟು ಬೇಸರ ಎಂಬಿತ್ಯಾದಿ ಭಾವನಾತ್ಮಕ ಮೌಲ್ಯ ತಿಳಿಯುತ್ತದೆ. ಇದು ಮಕ್ಕಳಲ್ಲಿ ಇತರರಿಗೆ ಒಗ್ಗಿಕೊಂಡು ಮುನ್ನಡಡೆಯುವ ಸಹಕಾರ್ಯಾಚರಣೆ ಮತ್ತು ಸಮನ್ವಯ ಮನೋಭಾವವನ್ನು ಬೆಳೆಸುತ್ತದೆ. ಹಾಗೆಯೇ ತಾವಾಗಿಯೇ ಅಡುಗೆ ಮಾಡುವಾಗ ಅಡುಗೆಗೆ ಬಳಸುವ ವಸ್ತುಗಳಲ್ಲಿರುವ ಘಟಕಾಂಶದ ಮಾಹಿತಿ ಬಗ್ಗೆ ಮಾಹಿತಿ ಸಿಕ್ಕುತ್ತಾ ಹೋದಂತೆಯೂ, ಯಾವುದು ಒಳ್ಳೆಯದು ಯಾವುದು ತಮಗೆ ಕೆಟ್ಟದ್ದು ಎಂಬ ಅರಿವು ಸಿಕ್ಕಿ ಮಕ್ಕಳು ಆಹಾರವನ್ನು ಗೌರವಿಸಲು ಪ್ರಾರಂಭಿಸುತ್ತಾರೆ.
ಮಕ್ಕಳ ಅಡುಗೆಗೆ ನಮ್ಮ ಸಹಕಾರ :
ಮಕ್ಕಳು ಅವರ ವಯಸ್ಸಿಗೆ, ಅವರ ಸಾಮರ್ಥ್ಯಕ್ಕೆ ತಕ್ಕಂತೆ ಅಡುಗೆ ಮನೆಯ ಸಣ್ಣ ಪುಟ್ಟ ಕೆಲಸಗಳನ್ನು ಮಾಡಲು ಬಿಡಿ. ಒತ್ತಾಯ ಬೇಡ, ಆಟಗಳ ಮೂಲಕ, ಮಕ್ಕಳ ಸ್ವಚ್ಛವಾದ ಆಟಿಕೆಗಳನ್ನು ಬಳಸಿಕೊಂಡು ಜೊತೆಗೂಡಿ ಮಾಡುವ ಅಡುಗೆಮನೆಯ ಕೆಲಸಗಳ ಆಕರ್ಷಿಸಿ.
ಪ್ರಾರಂಭದಲ್ಲಿ ಅಡುಗೆಮನೆಯ ಕಡೆಗೆ ಆಸಕ್ತಿ ಬರಲು, ಮಕ್ಕಳಿಗೆ ಅವರಿಷ್ಟದ ಆಹಾರ ಮಾಡಿಕೊಳ್ಳುವ ಅನುಮತಿ ನೀಡಿ. ಇದರಿಂದ ಮಕ್ಕಳು ಅಡುಗೆಯ ಕಡೆಗೆ ಉತ್ಸಾಹಭರಿತರಾಗುತ್ತಾರೆ ಜೊತೆಗೆ, ಅಡುಗೆ ಮನೆ ಸ್ವಚ್ಛವಾಗಿಟ್ಟು , ನಿಯಮಿತವಾಗಿ ಬಳಸುವ ವಸ್ತುಗಳನ್ನು ಸುಲಭವಾಗಿ ದಕ್ಕುವಂತೆ ಇಟ್ಟು ಪ್ರೇರಣೆ ನೀಡಿ.
ಮಕ್ಕಳು ಮೊದಲ ಬಾರಿಗೆ ಅಡುಗೆ ಮನೆ ಕಡೆ ಬಂದಾಗ ಅದೆಷ್ಟೋ ವಿಷಯಗಳು ತಿಳಿದಿರುವುದಿಲ್ಲ. ಬೆಚ್ಚಬಹುದು, ತಪ್ಪಬಹುದು, ಚೆಲ್ಲಬಹುದು, ರಾಡಿ ಮಾಡಬಹುದು. ಅವರ ಪ್ರಯತ್ನ ಮತ್ತು ಆಸಕ್ತಿಯನ್ನು ಯಾವ ಕಾರಣಕ್ಕೂ ಹೀಯಾಳಿಸದೆ, ಬೈಯದೆ, ಮುಕ್ತವಾಗಿ ಅವರ ಸಹಾಯವನ್ನು ಪ್ರಶಂಸಿಸಿ. ಕೆಲವೊಂದು ಕೆಟ್ಟರೂ ಒಳ್ಳೆಯದೇ, ಅದನ್ನು ಹೇಗೆ ಸರಿಪಡಿಸಬಹುದು ಅಥವಾ ಸ್ವಚ್ಛಗೊಳಿಸಬಹುದು ಎಂಬ ಶಿಕ್ಷಣವನ್ನೂ ನಾವು ನೀಡಲು ಅವಕಾಶ ಆಗುತ್ತದೆ. ಶಾಂತವಾಗಿ ತಿಳಿಸಿ ಹೇಳುವ ತಾಳ್ಮೆ ನಮಗೆ ಬೇಕಷ್ಟೆ.
ಮಗುವು ಮೊದಲ ಸಾರಿ ಮಾಡಿಕೊಟ್ಟ ಆಹಾರವನ್ನು ಮನೆಮಂದಿಯೆಲ್ಲ ಸ್ವೀಕರಿಸಿ ಒಂದು ಥಾಂಕ್ ಯು ಹೇಳಿದರೆ, ಮೆಚ್ಚಿಗೆ ತಿಳಿಸಿದರೆ, ಊಟವನ್ನು ಒದಗಿಸುವ ವ್ಯಕ್ತಿಗೆ ನೀಡಬಹುದಾದ ಮೌಲ್ಯ ಮತ್ತು ಗೌರವವನ್ನು ನೀವು ಮಗುವಿಗೆ ತೋರಿಸಿಕೊಟ್ಟಂತಾಗುತ್ತದೆ.
ಬೆಂಕಿ ಹಚ್ಚುವುದು, ಬಿಸಿ ಎಣ್ಣೆ, ಎಲೆಕ್ಟ್ರಿಕಲ್ ತಂತ್ರಜ್ಞಾನ ಉಪಕರಣಗಳ ಬಗ್ಗೆ ಹೆದರಿಸದೆ, ಮುನ್ನೆಚ್ಚರಿಕೆ ಕ್ರಮಗಳನ್ನು ತಿಳಿಸಿಕೊಟ್ಟರೆ ಸರಿ. ಶುರುವಿನಲ್ಲಿ ಜಾಗರೂಕತೆಗೆಂದು ನಮ್ಮ ಇರುವಿಕೆ ಅವಶ್ಯಕ. ಆದರೆ ನಮ್ಮ ಮುತುವರ್ಜಿ, ಅಧಿಕವಾದ ಆತಂಕ ತೋರ್ಪಡಿಕೆಯಾಗಿರದೆ, ಮಕ್ಕಳ ಜೊತೆ ನಿಂತು ಅವರೊಡನೆ ಉತ್ಸಾಹಭರಿತ ಮಾತುಕತೆಯಾಗಿದ್ದರ್, ಮಕ್ಕಳು ನಮ್ಮೊಡನೆ ಅಡುಗೆ ಮಾಡುವುದನ್ನು ಸಂಭ್ರಮಿಸುತ್ತಾರೆ.
ಕಾಮೆಂಟ್‌ಗಳಿಲ್ಲ:
ಕಾಮೆಂಟ್‌ ಪೋಸ್ಟ್ ಮಾಡಿ